2019 წლის 25-26 ივლისს, საქართველოში ჩატარდა რეგიონული კონფერენცია: "გენდერული სტატისტიკა: გამოწვევები და შესაძლებლობები მდგრადი განვითარების მიზნების (SDGs) მონიტორინგისთვის"
რეგიონული კონფერენცია  მიეძღვნა საქართველოს სტატისტიკის ეროვნული სამსახურის 100 წლის იუბილესა და გენდერული სტატისტიკის არსებობის 20 წლიან ისტორიას.

რეგიონულ კონფერენციაში მონაწილეობდნენ აღმოსავლეთ პარტნიორობის (EaP),  ცენტრალური აზიის  ქვეყნებისა და ასევე იტალიის, საფრანგეთის, უნგრეთის სტატისტიკის ეროვნული სამსახურების ხელმძღვანელი პირები და საერთაშორისო ორგანიზაციების (EUROSTAT, UNECE, UN Women) მაღალი დონის წარმომადგენლები.
 
მოწვეული სტუმრის სტატუსით ღონისძიებას ესწრებოდნენ საქართველოს პარლამენტის, არასამთავრობო ორგანიზაციების (NGOs), სამეცნიერო წრეებისა და საქართველოში აკრედიტებული საერთაშორისო ორგანიზაციების წარმომადგენლები.  
 
კონფერენციის დღის წესრიგის თანახმად, მონაწილეებმა, რვა თემატური სესიის ფარგლებში განიხილეს მდგრადი განვითარების მიზნების (SDGs) ნაციონალიზაციის პროცესში მიღწეული წარმატებები, გენდერული სტატისტიკის წარმოებისა და გავრცელების, დროის გამოყენების გამოკვლევის, გენდერულ ჭრილში აქტივების ფლობისა და მეწარმეობის, ქალთა მიმართ ძალადობის  გამოკვლევით გამოვლენილი გამოწვევებისა  და სხვა პრიორიტეტული საკითხები.
 
კონფერენციის თანაორგანიზატორებს წარმოადგენენ საქართველოს სტატისტიკის ეროვნული სამსახური და გაეროს ქალთა ორგანიზაცია (UN Women).