საქართველოს სტატისტიკის ეროვნული სამსახური 105 წლისაა. საიუბილეო თარიღთან დაკავშირებით  25 ივლისს,  საზეიმო ღონისძიება გაიმართა.
ღონისძიებაზე დამსწრე საზოგადოებას, მისასალმებელი სიტყვით საქართველოს პირველმა ვიცე-პრემიერმა, საქართველოს ეკონომიკისა და მდგრადი განვითარების მინისტრმა ლევან დავითაშვილმა, საქართველოს პარლამენტის თავმჯდომარის მოადგილე არჩილ თალაკვაძემ,  საქართველოს ფინანსთა მინისტრმა ლაშა ხუციშვილმა,   საქსტატის აღმასრულებელმა დირექტორმა გოგიტა თოდრაძემ და ეროვნული ბანკის პრეზიდენტმა ნათია თურნავამ მიმართეს. გამართულ ღონისძიებას 200-მდე სტუმარი ესწრებოდა, მათ შორის იყვნენ საქართველოს მთავრობისა და პარლამენტის წევრები, საერთაშორისო ორგანიზაციების, სამეცნიერო წრეების წარმომადგენლები და საქსტატის თანამშრომლები.
105 წლის იუბილესთან დაკავშირებულ ღონისძიებაში მონაწილეობის მისაღებად, საქართველოში ჩამოვიდნენ ევროკავშირის, კანდიდატი ქვეყნების, აღმოსავლეთ პარტნიორობისა (EaP) და ცენტრალური აზიის ქვეყნების სტატისტიკის სამსახურების ხელმძღვანელი პირები და საერთაშორისო ორგანიზაციების მაღალი რანგის წარმომადგენლები.

ღონისძიებაზე მოწვეულმა სტუმრებმა სპეციალურად ამ დღისთვის საქსტატის მიერ მომზადებული რამდენიმე ვიდეორგოლი იხილეს. მათ შორის, სტატისტიკის 105 წლიანი ისტორიის ამსახველი დოკუმენტური ფილმი, სადაც ისტორიულ ფაქტებზე დაყრდნობით წარმოდგენილი იყო სამსახურის დაარსებისა და ამ ერთი საუკუნის მანძილზე, მისი განვითარების ისტორია.

105 წლის იუბილისადმი მიძღვნილ საზეიმო ღონისძიებაზე გოგიტა თოდრაძემ საპატიო სიგელი გადასცა საქსტატის ღვაწლმოსილ თანამშრომლებს, რომლებიც სტატისტიკის სისტემაში უკვე 55 წელია მუშაობენ. 

აღმასრულებელმა დირექტორმა სტატისტიკის ეროვნული სამსახურის ყველა ყოფილი ხელმძღვანელი საქსტატის საიუბილეო მონეტით დააჯილდოვა და მადლობა გადაუხადა სტატისტიკის სისტემის განვითარებაში შეტანილი წვლილისთვის.