2024 წლის 25-26 ივლისს, საქართველოში ჩატარდა საერთაშორისო კონფერენცია: "გენდერული სტატისტიკა - ინკლუზიური განვითარების პროგრესის დაჩქარებისთვის“.

საერთაშორისო კონფერენცია  მიეძღვნა საქართველოს სტატისტიკის ეროვნული სამსახურის 105 წლის იუბილესა და გენდერული სტატისტიკის არსებობის 25 წლიან ისტორიას.

საერთაშორისო კონფერენციაში მონაწილეობდნენ ევროკავშირის, კანდიდატი ქვეყნების, აღმოსავლეთ პარტნიორობისა (EaP) და ცენტრალური აზიის ქვეყნების სტატისტიკის სამსახურების ხელმძღვანელი პირები და საერთაშორისო ორგანიზაციების მაღალი დონის წარმომადგენლები. 

მოწვეული სტუმრის სტატუსით ღონისძიებას ესწრებოდნენ საქართველოს სამთავრობო უწყებების, არასამთავრობო ორგანიზაციების (NGOs), სამეცნიერო წრეებისა და საქართველოში აკრედიტებული საერთაშორისო ორგანიზაციების წარმომადგენლები. 

კონფერენციის მონაწილეებმა შვიდი თემატური სესიის ფარგლებში განიხილეს გენდერული მონაცემების მართვის საკითხები ეფექტური გადაწყვეტილების მისაღებად, დროის გამოყენების გამოკვლევის შედეგები, გენდერული სახელფასო სხვაობა, ქალებისა და გოგონების მიმართ ძალადობის გამოკვლევის შედეგები, გენდერული თანასწორობის ინდექსი, გენდერული მონაცემების სრულყოფასთან დაკავშირებული და სხვა პრიორიტეტული საკითხები.

კონფერენციის თანაორგანიზატორებს წარმოადგენენ საქართველოს სტატისტიკის ეროვნული სამსახური და გაეროს ქალთა ორგანიზაცია (UN Women).