16 ნოემბერს გენდერული თანასწორობის, ქალთა მიმართ ძალადობისა და ოჯახში ძალადობის საკითხებზე მომუშავე უწყებათაშორისი კომისიის, საქართველოს სტატისტიკის ეროვნული სამსახურისა და გაეროს მოსახლეობის ფონდის (UNFPA) საქართველოს ოფისის თანამშრომლობით გაიმართა კონფერენცია თემაზე -„მონაცემები და ანალიზი გენდერული თანასწორობის გაძლიერებისათვის“. 
ღონისძიებაზე 2014 წლის მოსახლეობის საყოველთაო აღწერის შედეგებზე დაფუძნებული დეტალური ანალიზის მიხედვით აქცენტები გაკეთდა ისეთ მნიშვნელოვან საკითხებზე, როგორიცაა გენდერული საკითხები და დაბადებისას სქესთა რაოდენობრივი თანაფარდობის დინამიკა. 
უწყების აღმასრულებელმა დირექტორმა, მერი დაუშვილმა ხაზი გაუსვა კონფერენციის მნიშვნელობას. შეხვედრის მონაწილეებმა იმსჯელეს გენდერული მონაცემების წარმოების და გამოყენების შესაძლებლობებზე. მერი დაუშვილის განცხადებით, ანგარიშების მომზადების მიზანია აღწერის შედეგებით დაინტერესებული მხარეების ინფორმირება, ქვეყნისათვის აუცილებელი პოლიტიკის შემუშავება და პროგრამების დაგეგმვის ხელშეწყობა. 
სასტუმრო "რუმსში" გამართულ კონფერენციაში მონაწილეობა მიიღეს გენდერული თანასწორობის, ქალთა მიმართ ძალადობისა და ოჯახში ძალადობის საკითხებზე მომუშავე უწყებათაშორისი კომისიის, საქართველოს პარლამენტის გენდერული თანასწორობის საბჭოს, საქსტატის, სამეცნიერო წრეების, კვლევითი ორგანიზაციების, სამოქალაქო საზოგადოებისა და საერთაშორისო ორგანიზაციების წარმომადგენლებმა.