დღეს, 17 ნოემბერს, საქართველოს პარლამენტის ეროვნულ ბიბლიოთეკაში საქართველოს სტატისტიკის ეროვნულმა სამსახურმა ახალი სტატისტიკური პროდუქტის - ბიზნეს სტატისტიკაში გეოგრაფიული ინფორმაციული სისტემების (GIS ანალიზის პორტალის) პრეზენტაცია გამართა. აღნიშნული პროდუქტი ინტერაქტიული რუკების საშუალებით იძლევა გეოგრაფიული (სივრცითი) ანალიზისა და გამოკვლევის შედეგების სრულყოფილი ვიზუალიზაციის საშუალებას, რაც განსაკუთრებით მნიშვნელოვანია რეგიონული ანალიზის თვალსაზრისით. 
საქსტატის ხელმძღვანელობის განცხადებით, სტატისტიკაში გეოინფორმაციული სისტემების დანერგვა იძლევა ქვეყნის რეგიონების შედარებითი ანალიზის და გამოკვლევის შედეგების ვიზუალიზაციის საშუალებას. მასზე დატანილია აგრეთვე აქტიური კომპანიების გეოგრაფიული კოორდინატები. 
სტატისტიკის წარმოების და გავრცელების პროცესში გეოგრაფიული ინფორმაციული სისტემების დანერგვა ხელს შეუწყობს რესურსების ეკონომიას, გააუმჯობესებს მონაცემთა სიზუსტესა და ხარისხს. მისი გამოყენებით შესაძლებელია აგრეთვე მონაცემთა შეგროვების და მონიტორინგის პროცესის გამარტივება. 
GIS ანალიზის პორტალი, რომელიც შექმნილია გეოგრაფიული ინფორმაციული სისტემების (GIS) საფუძველზე, განთავსებულია საქსტატის ვებ-გვერდზე. მომავალში იგეგმება მასზე სხვადასხვა სტატისტიკური ინფორმაციის ასახვა. ღონისძიებას საერთაშორისო, არასამთვრობო ორგანიზაციების და სამთავრობო უწყების წარმომადგენლები ესწრებოდნენ.