საქართველოს სტატისტიკის ეროვნული სამსახური მომხმარებლებთან შეხვედრებს განაგრძობს. დღეს საქსტატის ხელმძღვანელობა ,,აწარმოე საქართველოში“ სააგენტოს ეგიდით საქართველოში მოქმედი კერძო კვლევითი კომპანიების წარმომადგენლებს შეხვდნენ. შეხვედრაზე მხარეებმა განიხილეს სტატისტიკის სფეროში შემავალი სხვადასხვა მნიშვნელოვანი საკითხები, როგორიცაა სიახლეები სტატისტიკური ინფორმაციის წარმოების და გავრცელების მიმართულებით, ახალი სერვისები და მომსახურების შემდგომი გაუმჯობესების მექანიზმები. კვლევითი ორგანიზაციების წარმომადგენლებმა აღნიშნეს, რომ საქსტატი მნიშვნელოვან წყაროს წარმოადგენს მათ საქმიანობაში, გამოთქვეს მადლიერება და ისაუბრეს ურთიერთთანამშრომლობის გაღრმავების და ინფორმაციის გაცვლის შემდგომ საჭიროებებზე. 
საქსტატის აღმასრულებელი დირექტორის, მერი დაუშვილის განცხადებით, ძალიან მნიშვნელოვანია მსგავსი სახის შეხვედრები, რადგან ის ხელს უწყობს დაინტერესებული მხარეების სტატისტიკურ საქმიანობაში ჩართულობას და მომხმარებლებისთვის სტატისტიკური ინფორმაციის მიწოდების ეფექტური გზების მოძიებას. მომხარებელთა საჭიროებების გათვალისწინება და ინფორმაციის ურთიერთგაცვლა საქსტატის მნიშვნელოვანი პრიორიტეტია. შესაბამისად, მსგავს საკითხებზე დაინტერესებულ კომპანიებთან და მომხმარებლებთან შეხვედრები მომავალშიც გაგრძელდება.