სტატისტიკის ეროვნულ სამსახურსა და საქართველოს ეროვნულ ბანკს შორის სტატისტიკის წარმოების სფეროში ურთიერთგაგების მემორანდუმი გაფორმდა

თარიღი: 28 იანვარი 2011

28 იანვარს, სტატისტიკის წარმოების სფეროში თანამშრომლობის შესახებ საქართველოს სტატისტიკის ეროვნულ სამსახურსა და ეროვნულ ბანკს შორის ურთიერთგაგების მემორანდუმი გაფორმდა. მემორანდუმს საქსტატის აღმასრულებელმა დირექტორმა ზაზა ჭელიძემ და საქართველოს ეროვნული ბანკის ვიცე–პრეზიდენტმა არჩილ მესტვირიშვილმა მოაწერეს ხელი. მემორანდუმი საერთაშორისო სავალუტო ფონდის ტექნიკური მისიების რეკომენდაციებს ეფუძნება და განსაზღვრავს სტატისტიკის სფეროში თანამშრომლობის ჩარჩოებს საქართველოს ეროვნულ ბანკსა და სტატისტიკის ეროვნულ სამსახურს შორის. აღნიშნულ მემორანდუმზე ხელმოწერით მხარეები შეთანხმდნენ, რომ თავიანთ სტატისტიკურ საქმიანობაში იხელმძღვანელებენ გაეროს სტატისტიკური კომისიის „ოფიციალური სტატისტიკის ფუნდამენტური პრინციპებით“, საქართველოს კანონით „ოფიციალური სტატისტიკის შესახებ“ და საქართველოს ორგანული კანონით „საქართველოს ეროვნული ბანკის შესახებ“; მემორანდუმი წარმოადგენს იმის საფუძველს, რომ მხარეები ინფორმაციის მიმოცვლის პროცედურების გამარტივების მიზნით, შეუფერხებლად ითანამშრომლებენ ამ მემორანდუმით გათვალისწინებული უფლებამოსილების ფარგლებში, დამატებითი ფორმალობების გარეშე. საქართველოს სტატისტიკის სისტემა წარმოდგენილია სტატისტიკის ეროვნული სამსახურის, ეროვნული ბანკისა და ფინანსთა სამინისტროს სახით, რომლებიც თანაბრად არიან პასუხისმგებელნი ეკონომიკური და ფინანსური მაჩვენებლების წარმოებასა და გავრცელებაზე, ქვეყნისა და საერთაშორისო მასშტაბით, თავიანთი კომპეტენციის ფარგლებში.