ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
უკან დაბრუნება
თარიღი: 23 აგვისტო 2019
საქართველოს სტატისტიკის ეროვნული სამსახურის აღმასრულებელი დირექტორი გოგიტა თოდრაძე, მსოფლიო სტატისტიკოსთა 62-ე კონგრესში მონაწილეობს, რომელიც მალაიზიის ქალაქ კუალა ლუმპურში, 18-დან 23 აგვისტოს ჩათვლით მიმდინარეობს.
მსოფლიოს სტატისტიკოსთა კონგრესში, რომელიც ყოველ ორ წელიწადში ერთხელ მსოფლიოს სხვადასხვა ქვეყანაში იმართება, მონაწილეობას იღებს მსოფლიოს მრავალი ქვეყნის სტატისტიკის სამსახურების და საერთაშორისო ორგანიზაციების ხელმძღვანელი პირები და წარმომადგენლები, ასევე ანალიტიკოსები, სამეცნიერო წრეების და ბიზნესის წარმომადგენლები. წლევანდელ შეხვედრას, რომელსაც მალაიზია მასპინძლობს, 2500-მდე დელეგატი ესწრება.
კონგრესზე საქსტატის აღმასრულებელმა დირექტორმა გააკეთა მოხსენება საქართველოს ეროვნული სტატისტიკის სისტემის შესახებ, რომლის ფარგლებშიც დამსწრე საზოგადოებას გაუზიარა საქართველოს გამოცდილება და ისაუბრა სტატისტიკური მონაცემების როლსა და მნიშვნელობაზე, ქვეყნის სტატისტიკის სისტემის განვითარების ძირითად მიმართულებებზე და არსებულ გამოწვევებზე. მან თავისი გამოსვლისას ხაზი გაუსვა ინტენსიური საერთაშორისო თანამშრომლობის მნიშვნელობას, ქვეყანაში სტატისტიკის სისტემის განვითარებისა და მისი შემდგომი გაუმჯობესების თვალსაზრისით.
ოფიციალური სტატისტიკის საკითხებთან დაკავშირებულ პანელურ დისკუსიაში, რომელსაც მოდერატორობას შვეიცარიის სტატისტიკის სამსახურის ხელმძღვანელი უწევდა, საქსტატის ხელმძღვანელთან ერთად მონაწილეობდნენ სომხეთის სტატისტიკის სამსახურის, გაეროს ევროპის ეკონომიკური კომისიის(UNECE), ევროპის თავისუფალი ვაჭრობის ასოციაციისა(EFTA) და ვენის ეკონომიკისა და ბიზნესის უნივერსიტეტის წარმომადგენლები და ხელმძღვანელი პირები.
ვიზიტის ფარგლებში გოგიტა თოდრაძემ შეხვედრა გამართა მალაიზიის სტატისტიკის სამსახურის ხელმძღვანელთან ბ-ნ მოხდ უზირ მაჰიდინთან, რომელიც იმავდროულად UNESCAP-ის სტატისტიკის კომიტეტის ბიუროს ხელმძღვანელობს. შეხვედრაზე ორი ქვეყნის სტატისტიკის სამსახურის ხელმძღვანელმა პირებმა ისაუბრეს მომავალი თანამშრომლობის შესაძლო გაღრმავებაზე სამსახურებს შორის, როგორც ოფიციალური სტატისტიკის წარმოებისა და გავრცელების, ასევე ახალი მეთოდებისა და თანამედროვე ტექნოლოგიების დანერგვის მიმართულებით გამოცდილების გაზიარების შესახებ.
ვიზიტის დროს გოგიტა თოდრაძე ასევე მიწვეული იყო მალაიზიის ერთ-ერთი ტელევიზიის ეთერში, სადაც ისაუბრა ოფიციალური სტატისტიკის მნიშვნელობაზე, არსებულ გამოწვევებსა და შესაძლებლობებზე.
