ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
უკან დაბრუნება
თარიღი: 30 დეკემბერი 2021
29 დეკემბერს საქსტატში უწყებათაშორისი საბჭოს სხდომა გაიმართა, რომელზეც საქსტატის აღმასრულებელმა დირექტორმა - გოგიტა თოდრაძემ, განსახილველად წარადგინა საქართველოს ოფიციალური სტატისტიკის სისტემის ეროვნული სტრატეგიის განხორციელების 2022-2023 წლების სამოქმედო გეგმა.
უწყებათაშორისი საბჭო საქართველოს მთავრობის დადგენილებით 2019 წლიდან ფუნქციონირებს და ევალება ოფიციალური სტატისტიკის სისტემის 2020-2023 წლების განვითარების სტრატეგიის, ასევე შესაბამისი სამოქმედო გეგმის შემუშავება და საქართველოს მთავრობისთვის დასამტკიცებლად წარდგენა.
საბჭო, რომელსაც საქსტატის აღმასრულებელი დირექტორი ხელმძღვანელობს, თერთმეტი წევრისგან შედგება და აერთიანებს საქართველოს ეროვნული ბანკის ვიცე-პრეზედენტს, საქართველოს მთავრობის ადმინისტრაციას და რვა სამინისტროს წარმომადგენელს, მინისტრის მოადგილეების დონეზე.
საქსტატის 2022-2023 წლების სამოქმედო გეგმა, ითვალისწინებს ეროვნულ და საერთაშორისო საჭიროებებს, პასუხობს პოლიტიკის შემუშავებისთვის საჭირო მონაცემებზე მოთხოვნას, განსაზღვრავს სტატისტიკის განვითარების პრიორიტეტულ მიმართულებებს; უზრუნველყოფს სტატისტიკური ღონისძიებების ჩატარების გონივრულობას და ფინანსური რესურსების განაწილებას; ის წარმოადგენს ჩარჩოს საერთაშორისო თანამშრომლობისათვის და შეესაბამება თანამედროვე საერთაშორისო სტანდარტებს.
სამოქმედო გეგმის პროექტი მომზადებულია პოლიტიკის დაგეგმვის, მონიტორინგის და შეფასების სახელმძღვანელოს მოთხოვნების შესაბამისად. ის შედგება 3 მიზნის, 12 ამოცანისა და 76 აქტივობისგან. გოგიტა თოდრაძემ საბჭოს წევრებს დეტალურად წარუდგინა ინფორმაცია თითოეული მიზნითა და ამოცანებით განსაზღვრული აქტივობების შესახებ, პასუხისმგებელი უწყებების, საჭირო ბიუჯეტისა და შესრულების ვადების მითითებით.
უწყებათაშორისი საბჭოს წევრებმა მოიწონეს საქსტატის 2022-2023 წლების სამოქმედო გეგმის პროექტი, რომელიც უახლოეს დღეებში დასამტკიცებლად წარედგინება საქართველოს მთავრობას.
2022-2023 წლების სამოქმედო გეგმა, დამტკიცების შემდეგ განთავსდება საქსტატის ვებ-გვერდზე და ხელმისაწვდომი იქნება ნებისმიერი დაინტერესებული მომხმარებლისთვის.
