საქსტატმა რეგიონებში გასვლითი საინფორმაციო შეხვედრები დაიწყო

თარიღი: 16 ივლისი 2022

საქართველოს სტატისტიკის ეროვნულმა სამსახურმა ინფორმაციის მომხმარებლებთან გასვლითი საინფორმაციო შეხვედრები დაიწყო. პირველი შეხვედრა გურიის რეგიონში ჩატარდა, რომლის აუდიტორიას ოზურგეთის, ლანჩხუთისა და ჩოხატაურის მუნიციპალიტეტების სტატისტიკური ინფორმაციის მომხმარებლები - თვითმმართველობების თანამშრომლები, ბიზნეს სექტორის, არასამთავრობო ორგანიზაციების, აკადემიური წრისა და მედიის წარმომადგენლები წარმოადგენდნენ. 

 

შეხვედრის მიზანს წარმოადგენდა მომხმარებლებისთვის საქსტატის მუშაობის სპეციფიკის, გამოყენებული მეთოდოლოგიებისა და გურიის რეგიონის შესახებ, საქსტატის მიერ წარმოებული მონაცემების გაცნობა.

 

შეხვედრის ფარგლებში მონაწილეები გაეცნენ საქართველოს სტატისტიკის სისტემის განვითარების ძირითად მიმართულებებს, საქსტატის მიერ შემუშავებულ პროდუქტებს, განვითარებულ სერვისებს და სამომავლო გეგმებს. ასევე, განიხილეს სტატისტიკური მაჩვენებლების გაანგარიშების მეთოდოლოგიური თავისებურებები და მათ გამოყენებასთან დაკავშირებული საკითხები; იმსჯელეს სხვადასხვა სტატისტიკურ ინდიკატორებზე და მონაცემთა საჭიროებებზე, დაგეგმვისა და გადაწყვეტილების მიღების პროცესში.

 

შეხვედრის შემდეგ საქსტატის აღმასრულებელმა დირექტორმა გოგიტა თოდრაძემ აღნიშნა, რომ მსგავსი ტიპის საინფორმაციო შეხვედრები მნიშვნელოვანია და ხელს შეუწყობს ცნობიერების ამაღლებას მათთვის საინტერესო საკითხებთან დაკავშირებით.

 

საქსტატი გეგმავს წლის განმავლობაში შეხვედრები გამართოს ყველა რეგიონის რესპოდენტებთან, ბიზნეს სექტორის, არასამთავრობო ორგანიზაციების, აკადემიური წრეებისა და მედიის წარმომადგენლებთან.