ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
უკან დაბრუნება
თარიღი: 16 სექტემბერი 2022
საქართველოს სტატისტიკის ეროვნული სამსახური (საქსტატი) აჭარის მთავრობისა და ადგილობრივი თვითმმართველობის წარმომადგენლებთან გასვლით სამუშაო შეხვედრას მართავს.
შეხვედრა, რომელიც 16-17 სექტემბერს ქობულეთის მუნიციპალიტეტში, დაბა ჩაქვში მიმდინარეობს, გაეროს განვითარების პროგრამის (UNDP) მიერ დაფინანსებული პროექტის - „მონაცემთა შეგროვების პროცესის გაუმჯობესება და ოფიციალური სტატისტიკის მიმართ ნდობის ამაღლება" ფარგლებში ტარდება.
გასვლით სამუშაო შეხვედრას, რომელშიც მონაწილეობენ აჭარის მთავრობის ადმინისტრაციის, უმაღლესი საბჭოს, ოთხივე სამინისტროსა და ექვსივე მუნიციპალიტეტის ეკონომიკური და ფინანსური სამსახურების წარმომადგენლები, საქსტატის აღმასრულებელი დირექტორის მოადგილე ირაკლი აფხაიძე ხელმძღვანელობს.
ორდღიანი სამუშაო შეხვედრისას, მონაწილეები გაეცნობიან საქართველოს სტატისტიკის სისტემის განვითარების ძირითად მიმართულებებს, საქსტატის მიერ შემუშავებულ პროდუქტებს, განვითარებულ სერვისებსა და სამომავლო გეგმებს. ასევე, განიხილავენ სტატისტიკური მაჩვენებლების გაანგარიშების მეთოდოლოგიურ თავისებურებებსა და მათ გამოყენებასთან დაკავშირებული საკითხებს. იმსჯელებენ სხვადასხვა სტატისტიკურ ინდიკატორებსა და მონაცემთა საჭიროებებზე, დაგეგმვისა და გადაწყვეტილების მიღების პროცესში.
შეხვედრის ფარგლებში გაიმართება დისკუსია, შეხვედრის მონაწილეები განიხილავენ მუნიციპალიტეტების სტატისტიკურ მონაცემებთან დაკავშირებულ საჭიროებებს და იმსჯელებენ საქსტატის სამომავლო გეგმებში მათი ასახვის შესაძლებლობებზე.
აღნიშნული პროექტის ფარგლებში, საქსტატი სტატისტიკური ინფორმაციის მომხმარებლებთან კიდევ ხუთ სამუშაო შეხვედრას გამართავს.
