საქართველოს სტატისტიკის ეროვნული სამსახური შვედ ექსპერტებს მასპინძლობს. შვედი კოლეგების ვიზიტი სამდღიანია და ის საქსტატისა და შვედეთის სტატისტიკის ერთობლივი პროექტის ფარგლებში მიმდინარეობს. სამუშაო შეხვედრაზე უცხოელი კოლეგები საქსტატის ეროვნული ანგარიშების სამმართველოს თანამშრომლებს თავიანთ გამოცდილებას უზიარებენ. 
ვიზიტის ფარგლებში განსახილველ საკითხებს წარმოადგენს სექტორული ანგარიშების წარმოებისა და ფინანსური შუამავლობის მომსახურების არაპირდაპირი შეფასების სფეროში შვედეთის სტატისტიკის გამოცდილების გაზიარება და პრაქტიკული გაანგარიშებების განხორციელება. 
საქსტატსა და შვედეთის სტატისტიკას შორის თანამშრომლობის პროექტი 2011 წლიდან მიმდინარეობს. პროექტის ფარგლებში შვედეთის სტატისტიკა საქსტატს ტექნიკურ დახმარებას უწევს მთლიანი შიდა პროდუქტის წარმოების, ინფლაციის, გარემოსდაცვითი სტატისტიკის, თანამშრომელთა ტრენინგის და სხვა ძირითადი სტატისტიკური კომპონენტების გაუმჯობესების მიმართულებით. პროექტი სრულად დაფინანსებულია შვედეთის საერთაშორისო განვითარების სააგენტოს (SIDA) მიერ.