შეხვედრა თბილისის 52-ე საჯარო სკოლის მოსწავლეებთან

თარიღი: 1 ივნისი 2023

საქართველოს სტატისტიკის ეროვნულმა სამსახურმა, ბავშვთა დაცვის საერთაშორისო დღეს, თბილისის 52-ე საჯარო სკოლის მეათე კლასის მოსწავლეებისათვის პორტალის - ,,სტატისტიკა ბავშვებისთვის და მოზარდებისთვის“ პრეზენტაცია გამართა.

 

საქსტატის აღმასრულებელმა დირექტორმა მოსწავლეებს საქართველოს შესახებ საინტერესო და სახალისო სტატისტიკური ფაქტები გააცნო და მათთან ერთად შემეცნებითი ქვიზები შეავსო.

 

პორტალი ,,სტატისტიკა ბავშვებისთვის და მოზარდებისთვის“  სხვადასხვა ასაკობრივ ჯგუფებზეა განკუთვნილი და     ორი ძირითადი ნაწილისგან  შედგება. პირველი ნაწილი - „სტატისტიკა ბავშვებისთვის“ - განკუთვნილია 8-დან 12 წლის ასაკის ბავშვებისთვის, ხოლო მეორე ნაწილი, „სტატისტიკა მოზარდებისთვის “ 13-დან 19 წლის ასაკის ახალგაზრდებზეა მორგებული.

 

52-ე საჯარო სკოლის მოსწავლეები ინტერესით გაეცნენ მოზარდებზე ორიენტირებულ პორტალის მეორე ნაწილს,   რომელიც 13-დან 19 წლის ასაკის ახალგაზრდებზეა მორგებული. პორტალის ამ ნაწილში წარმოდგენილია საინტერესო ინფორმაცია საქართველოს შესახებ. აღნიშნული ნაწილის მეშვეობით მოზარდებს ეძლევა შესაძლებლობა ამოხსნან შემეცნებითი ქვიზები და გაეცნონ სახალისო სტატისტიკურ ფაქტებს.

 

საქსტატის შენობაში სკოლის მოსწავლეებმა ასევე დაათვალიერეს სტატისტიკის მუზეუმი, სადაც  განთავსებულია უწყების ასწლოვანი  ისტორიის ამსახველი ფოტო მასალა და   გამოთვლითი ტექნიკა. 

 

როგორც გოგიტა თოდრაძემ აღნიშნა, ინტერაქტიული პორტალის მიზანია, ბავშვებისა და ახალგაზრდებისთვის სტატისტიკური ინფორმაციის მიწოდება საინტერესო და სახალისო გზით. პორტალი მნიშვნელოვნად შეუწყობს ხელს ბავშვებსა და მოზარდებს გაიღრმავონ ცოდნა სტატისტიკის სფეროში, გაიუმჯობესონ ინფორმაციის სწორად აღქმისა და ანალიტიკური აზროვნების უნარები, იყვნენ უფრო მეტად ინფორმირებულები ბავშვთა უფლებების შესახებ და მიიღონ მტკიცებულებებზე დაფუძნებული გადაწყვეტილებები.

 

საქსტატი მომავალშიც აქტიურად გეგმავს მოზარდებისთვის შემეცნებითი შეხვედრების გამართვას.