ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
უკან დაბრუნება
თარიღი: 26 მარტი 2025
25 მარტს, ოფიციალური სტატისტიკის ეროვნული სისტემის საკოორდინაციო უწყებათაშორისი საბჭოს პირველი სხდომა გაიმართა. შეხვედრა საქართველოს სტატისტიკის ეროვნული სამსახურის აღმასრულებელმა დირექტორმა და ამავე დროს საბჭოს თავმჯდომარემ გოგიტა თოდრაძემ გახსნა. უწყებათაშორისი საბჭო მიმდინარე წლის მარტში საქართველოს მთავრობის დადგენილებით შეიქმნა, რომელიც სტატისტიკური სისტემის გაუმჯობესების მიზნით, კოორდინაციას უწევს სტატისტიკის წარმოებაზე პასუხისმგებელ სამუშაო ჯგუფებს.
შეხვედრაზე საკოორდინაციო უწყებათაშორისი საბჭოს თავმჯდომარემ, გოგიტა თოდრაძემ მიმოიხილა საბჭოს დებულება და საბჭოს წევრებს წარუდგინა ოფიციალური სტატისტიკის ეროვნული სისტემის საკოორდინაციო უწყებათაშორისი სამუშაო ჯგუფების ტექნიკური დავალებები, რომელთა მიზანია სტატისტიკური ინფორმაციის წარმოების გაუმჯობესება და მონაცემთა ხარისხის უზრუნველყოფა.
შეხვედრაში მონაწილეობდნენ საქართველოს მთავრობის სხვადასხვა უწყებების წარმომადგენლები მინისტრის მოადგილეების დონეზე. სხდომაზე საბჭოს წევრებმა კენჭი უყარეს და დაამტკიცეს ორი მნიშვნელოვანი სამუშაო ჯგუფი, რომლებიც შეიქმნა ევროკავშირში ინტეგრაციის პროცესთან დაკავშირებული სტატისტიკის და გენდერული სტატისტიკის საკითხების შესასწავლად.
ევროკავშირში ინტეგრაციის პროცესთან დაკავშირებული სტატისტიკის საკითხებზე მომუშავე ჯგუფის მიზანია, ევროკავშირში ინტეგრაციის პროცესთან დაკავშირებული სტატისტიკის წარმოება. მათ შორის, ჯგუფი შეიმუშავებს მეთოდოლოგიურ მიდგომებსა და ხარისხის ერთიან სტანდარტს, რომელიც შესაბამისი ადმინისტრაციული მონაცემების ხარისხის გაუმჯობესებას და ახალი მაჩვენებლების შექმნას მოიცავს.
გენდერული სტატისტიკის საკითხებზე მომუშავე ჯგუფის მიზანს კი გენდერული სტატისტიკის მიმართულების გაძლიერება წარმოადგენს. ჯგუფი, ასევე, ხელს შეუწყობს სტატისტიკის ეროვნული სისტემის კოორდინაციის გაუმჯობესებას, შესაბამისი ადმინისტრაციული მონაცემების ხარისხის ამაღლებასა და ახალი მაჩვენებლების შემუშავებას.
სხდომის დასასრულს, საქსტატის აღმასრულებელმა დირექტორმა გოგიტა თოდრაძემ მადლობა გადაუხადა საბჭოს წევრებს შეხვედრაში აქტიური მონაწილეობისთვის. საბჭოს წევრებმა გამოხატეს მზადყოფნა, აქტიურად იმუშავონ საქართველოს სტატისტიკის სისტემის სტანდარტიზაციის და გამჭვირვალობის მიმართულებით.
