საქართველო-ბულგარეთის სავაჭრო, ეკონომიკური და სამეცნიერო-ტექნიკური თანამშრომლობის მთავრობათაშორისი კომისიის მეხუთე სხდომის ფარგლებში, საქართველოს სტატისტიკის ეროვნულ სამსახურსა და ბულგარეთის ეროვნულ სტატისტიკურ ინსტიტუტს შორის ურთიერთანამშრომლობის მემორანდუმი გაფორმდა. 
ორმხრივი თანამშრომლობა სტატისტიკის სფეროში მოიცავს სხვადასხვა სტატისტიკურ მიმართულებებს, მათ შორის ევროკავშირის სტატისტიკური კანონმდებლობის გაცნობა, სტატისტიკის წარმოების და გავრცელების პროცესები, ხარისხის მართვა და სხვა. 
საქსტატსა და ბულგარეთის სტატისტიკურ ინსტიტუტს შორის გაფორმებული მემორანდუმი მხარეებს ახალი პროექტების განვითარების შესაძლებლობას მისცემს. დოკუმენტი ასევე, ხელს შეუწყობს ორ ქვეყანას შორის გამოცდილების და ცოდნის გაზიარებას სტატისტიკის სფეროში, კონკრეტული მიმართულებებით ექსპერტების გაცვლას, სასწავლო ვიზიტების და ტრენინგების ორგანიზებას და სხვა აქტივობებს.
ქართული მხარის განცხადებით, ეს დოკუმენტი მნიშვნელოვანი საფუძველია უწყებებს შორის შემდგომი სტრატეგიული თანამშრომლობისთვის, რათა საქართველოს სტატისტიკის ეროვნული სამსახური კიდევ უფრო დაუხლოვდეს ევროპულ ნორმებსა და სტანდარტებს. 
კომისიას საქართველოს მხრიდან თანათავმჯდომარეობდა საქართველოს ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი, ხოლო ბულგარეთის მხრიდან - ბულგარეთის ტრანსპორტის, საინფორმაციო ტექნოლოგიებისა და კომუნიკაციების მინისტრი ივაილო მასკოვსკი.