საქსტატსა და შვედეთის სტატისტიკის სამსახურის თანამშრომლობის პროექტის ფარგლებში დღეს საქართველოს სტატისტიკის ეროვნულ სამსახურში წლიური შემაჯამებელი შეხვედრა გაიმართა. 
შეხვედრას ესწრებოდნენ საქსტატის, შვედეთის სტატსიტიკის სამსახურის და შვედეთის საერთაშორისო განვითარების სააგენტოს (Sida) წარმომადგენლები.
შეხვედრაზე შეჯამდა გასული წლის განმავლობაში პროექტის ფარგლებში მიღწეული შედეგები, განიხილეს მიმდინარე საკითხები და სამომავლო გეგმები.
საქსტატის ხელმძღვანელის, მერი დაუშვილის განცხადებით, შეხვედრაზე მხარეებმა ისაუბრეს 2015 წლის განმავლობაში პროექტის ფარგლებში მიღწეულ შედეგებზე და 2016 წლის გეგმებზე, როგორიცაა: მოკლევადიან მისიათა თემატიკა, საქსტატის თანამშრომლების ტრენინგების მიმართულებები და სხვა.
საქსტატსა და შვედეთის სტატისტიკას შორის თანამშრომლლობის პროექტი 2011 წლიდან მიმდინარეობს. გასულ წელს დაიწყო პროექტის ახალი ფაზა, რომელიც 2018 წლამდე გაგრძელდება. პროექტის ფარგლებში შვედეთის სტატისტიკა საქსტატს ტექნიკურ დახმარებას უწევს ინფლაციის, მთლიანი შიდა პროდუქტის, თანამშრომელთა ტრენინგის და სხვა ძირითადი სტატისტიკური კომპონენტების ხარისხის გაუმჯობესების მიმართულებით. პროექტი სრულად დაფინანსებულია შვედეთის საერთაშორისო განვითარების სააგენტოს მიერ.