საქართველოს სტატისტიკის ეროვნულმა სამსახურმა ხარისხის მართვის საკითხებზე მუდმივმოქმედი უწყებათაშორისი სამუშაო ჯგუფის შეხვედრას უმასპინძლა. უწყებაში ჩატარებულ სემინარზე შვედეთის სტატისტიკის ბიუროს ექსპერტმა მარი კოლინმა ჯგუფის წევრებს ოფიციალური სტატისტიკის სფეროში არსებული ხარისხის საერთაშორისო სტანდარტები გააცნო. შეხვედრის მონაწილეებს ექსპერტი ეროვნული სტატისტიკური სისტემის განვითარების პროცესში სტატისტიკის მწარმოებელთა როლზეც ესაუბრა.
მუდმივმოქმედი უწყებათაშორისი სამუშაო ჯგუფის მიზანია ქვეყანაში სტატისტიკის ეროვნული სისტემის განვითარების ხელშეწყობა და სტატისტიკის წარმოების ხარისხის გაუმჯობესება. ჯგუფის მუშაობის ფარგლებში აქამდე ჩატარებულ შეხვედრებზე განიხილეს ევროპის სტატისტიკის პრაქტიკის კოდექსის პრინციპები, სტატისტიკის წარმოების პროცესების ხარისხის გაუმჯობესების და საერთაშორისო სტანდარტებთან ჰარმონიზების მიზნით საქსტატის მიერ ჩატარებული სამუშაოები და სხვა საკითხები.