დღეს თბილისში გაეროს ბავშვთა ფონდის მიერ ორგანიზებული საერაშორისო სემინარი გაიხსნა, რომელიც ,,მრავალინდიკატორული კლასტერული კვლევის" ჩატარების მოსამზადებელ სამუშაოებს ეძღვნება. ღონისძიება უცხოელ ექსპერტებთან ერთად საქართველოს მთავრობის ადმინისტრაციის უფროსმა მაია ცქიტიშვილმა და საქსტატის აღმასრულებელმა დირექტორმა მერი დაუშვილმა გახსნა. სემინარის მონაწილეებს სიტყვით მიმართა საქართველოს სტატისტიკის აღმასრულებელმა დირექტორმა და საქართველოში „მრავალინდიკატორული კლასტერული კვლევის (MICS) ჩატარების მნიშვნელობაზე ისაუბრა.
მისი თქმით, "მიქსის ჩატარება ჩვენს ქვეყნებს მისცემს შესაძლებლობას,მაღალი ხარისხისა და საერთაშორისოდ შესადარისი მონაცემების შეგროვების გზით,მიიღოს მრავალი სოციალურ-დემოგრაფიული ინდიკატორი, რომლებიც ასახავენ დედათა და ბავშვთა ჯანმრთელობის დაცვას, განათლებას, გარემოს (მათ შორის, მონაცემებს წყლისა და სანიტარიის შესახებ), ბავშვთა დაცვას, რეპროდუქციულ ჯანმრთელობას და სხვა."
მე-6 რაუნდის მრავალინდიკატორული კლასტერული კვლევა (MICS) მოიცავს შინამეურნეობების კვლევაზე დაფუძნებულ ინდიკატორებს, რომელთა უდიდესი ნაწილი შეესაბამება მსოფლიო ქვეყნების მიერ გაზიარებულ ერთ-ერთ უმნიშვნელოვანეს ინიციატივას - მდგრადი განვითარების მიზნებს. კვლევის შედეგად მიიღება ეროვნული და საერთაშორისო ვალდებულებების შესრულების შესაფასებლად საჭირო მაჩვენებლები, რაც აუცილებელია ჩვენს ქვეყნებში ბავშვებისა და ქალების მდგომარეობის მონიტორინგისთვის.
საქართველოში მრავალინდიკატორული კლასტერული კვლევა ბოლოს 2005 წელს ჩატარდა.
ღონისძიებას უცხოელ ექსპერტებთან ერთად 19 ქვეყნის წარმომადგენლები უმეტესად, დსთ-სა და აღმოსავლეთ და ცენტრალური ევროპის ქვეყნებიდან ესწრებიან. სემინარი დღეს სასტუმრო "ქორთიარდ მარიოტში" გაიხსნა და ის 8 თებერვლამდე გაგრძელდება.