საქართველოს სტატისტიკის ეროვნული სამსახურის ორგანიზებით გაიმართა ღონისძიება - ,,ოფიციალური სტატისტიკის ფუნდამენტური პრინციპები“. საქართველოს პარლამენტის ეროვნულ ბიბლიოთეკაში გამართულ შეხვედრაზე წარმოდგენილი იყო ევროპის კავშირის სტატისტიკური სამსახურის (ევროსტატის) წარმომადგენლის კლაუდია იუნკერის პრეზენტაცია - ,,გაეროს ფუნდამენტური პრინციპები ოფიციალური სტატისტიკის სფეროში“. შეხვედრაზე წარმოდგენილ პრეზენტაციაში გაეროს ფუნდამენტურ პრინციპებთან ერთად, განხილული იყო ევროპის სტატისტიკის კოდექსის დებულებებიც. 
ევროსტატის წარმომადგენელი ქ-ნი იუნკერი 20 წელზე მეტია მონაწილეობს სამხრეთ–აღმოსავლეთი ევროპისა და ყოფილი საბჭოთა კავშირის ქვეყნებში ოფიციალური სტატისტიკის რეფორმირების მიზნით ევროკავშირის მიერ განხორციელებულ პროექტებში. ამჟამად იგი ხელმძღვანელობს ევროსტატის სტრუქტურულ ქვედანაყოფს, რომელიც კოორდინირებას უწევს აღნიშნულ ქვეყნებთან ევროსტატის თანამშრომლობას. 
საქსტატის აღმასრულებელი დირექტორის, მერი დაუშვილის განცხადებით, ევროსტატის მაღალი დონის წარმომადგენელის ვიზიტი და გამოცდილების გაზიარება განსაკუთრებულ მნიშვნელობას იძენს ევროკავშირსა და საქართველოს შორის გაფორმებული ასოცირების ხელშეკრულების ფარგლებში ნაკისრი ვალდებულებების შესასრულებლად. შეხვედრა ემსახურება ოფიციალური სტატისტიკის ეროვნული სისტემის - ქვეყანაში ოფიციალური სტატისტიკის მწარმოებელი ორგანოების გაძლიერებას, სტატისტიკური მონაცემების წარმოების გაუმჯობესებას და მათ შესაბამისობას ევროპულ ნორმებთან და სტანდარტებათან.