საქართველოს სტატისტიკის ეროვნული სამსახურის აღმასრულებელმა დირექტორმა მონაწილეობა მიიღო რელიგიის საკითხთა სახელმწიფო სააგენტოს მიერ ორგანიზებულ ღონისძიებაში, რომელიც ეხებოდა რელიგიური რუკების პრეზენტაციას. 
რელიგიის საკითხთა სახელმწიფო სააგენტომ, საქსტატთან მჭიდრო თანამშრომლობით, 2014 წელს ჩატარებული მოსახლეობის საყოველთაო აღწერის მონაცემებზე დაყრდნობით მოამზადა ციფრული რუკა, რომელშიც წარმოდგენილია მოსახლეობის რელიგიური შემადგენლობის რაოდენობრივი და პროცენტული მაჩვენებლები. 
საქსტატის აღმასრულებელი დირექტორის მერი დაუშვილის განცხადებით, მოსახლეობის საყოველთაო აღწერა წარმოადგენს ერთადერთ საინფორმაციო წყაროს მოსახლეობის აღმსარებლობის შესახებ. მან მადლობა გადაუხადა რელიგიის საკითხთა სახელმწიფო სააგენტოს რუკების მომზადებისთვის და აღნიშნა, რომ რუკების შექმნა ძალიან მნიშვნელოვანია, რადგან ის იძლევა მოსახლეობის რელიგიური შემადგენლობის ყველაზე რეალურ სურათს. ღონისძიებას ესწრებოდა აღმასრულებელი, საკანონმდებლო ხელისუფლების და სხვადასხვა რელიგიური მიმდინარეობების წარმომადგენლები.