25 ივლისი საქართველოს სტატისტიკის დღეა. ქართული სტატისტიკის დღესთან დაკავშირებით საქართველოს სტატისტიკის ეროვნულმა სამსახურმა პროფესიული დღე აღნიშნა. უწყების 98-ე იუბილეზე საქსტატმა წარმატებული თანამაშრომლები და ინფორმაციის მომწოდებელი საუკეთესო ბიზნეს კომპანიები სპეციალური სიგელებით დააჯილდოვა. სტატისტიკის ეროვნული სამსახურის აღმასრულებელი დირექტორის, მერი დაუშვილის განცხადებით, რესპონდენტებთან და მომხმარებლებთან აქტიური კომუნიკაცია საქსტატისთვის მნიშვნელოვანი ამოცანაა. მისი თქმით, მსგავსი სახის ღონისძიებები თანამაშრომლებისთვის სტიმულის მომცემია, რათა მათ მომავალში კიდევ უფრო ნაყოფიერად იმუშაონ.
აღნიშნული თარიღი საქართველოში ოფიციალური სტატისტიკის წარმოების დაწყებას უკავშირდება. სწორედ 1919 წლის 25 ივლისს შეიქმნა სტატისტიკის პირველი სამსახური, 1921 წელს კი დამტკიცდა პირველი დებულება. საქართველოს სტატისტიკის ეროვნული სამსახური ყველა სტატისტიკოსს ულოცავს ამ დღეს და უსურვებს პროფესიულ წარმატებებს.
საქსტატის დღესთან დაკავშირებით სპეციალური სიგელები გადაეცათ შემდეგ ორგანიზაციებს: სს "საქართველოს ნავთობისა და გაზის კორპორაცია", შპს "თბილისის სატრანსპორტო კომპანია“, შპს ,,ბურჯი“, შპს "ანაგი", შპს "ჯი ემ პი", შპს "მარშე", შპს "აგრომაქსი" და შპს "მეღვინეობა ხარება".