თბილისში 4 ოქტომბერს გაეროს ევროპის ეკონომიკური კომისიის (UNECE) მიერ ორგანიზებული სემინარი - „ეროვნული შესაძლებლობების გაძლიერება სტატისტიკის მდგრადი განვითარებისთვის“ გაიხსნა. 
სემინარის მიმდინარეობის პერიოდში განხილული იქნება სტატისტიკის სფეროს განვითარების შესაძლებლობები და გამოწვევები. მონაწილე ქვეყნები იმსჯელებენ გლობალური შეფასების რეკომენდაციების შედეგების და ზეგავლენის, გლობალური ამოცანების, მათ შორის მდგრადი განვითარების მიზნების ეროვნულ სტრატეგიებსა და სტატისტიკურ სამუშაოთა პროგრამებში ინტეგრირების მიმართულებებზე. ასევე, სემინარზე განიხილება ქვეყნებში არსებული საკანონმდებლო ბაზა, მისი მოდერნიზაციის, რისკების მართვის სისტემატიზაციის და სხვა მნიშვნელოვანი საკითების ფართო წრე. სემინარი მიზნად ისახავს მონაწილე ქვეყნებში სტატისტიკური სისტემების მდგრადი განვითარების შესაძლებლობების გაუმჯობესებას. 
ღონისძიებას საქართველოს სტატისტიკის ეროვნული სამსახურის ხელმძღვანელობა დაესწრო. საქსტატის აღმასრულებელმა დირექტორმა მერი დაუშვილმა სემინარის მხარდაჭერისა და ორგანიზებისთვის განსაკუთრებული მადლობა გადაუხადა გაეროს ევროპის ეკონომიკურ კომისიას (UNECE) და მე-9 ტრანშის პროექტის დასკვნითი ღონისძიების საქართველოში გამართვას მნიშვნელოვანი უწოდა. მისი განცხადებით, მიმდინარე სემინარი საუკეთესო საშუალებაა ქვეყნებში არსებული პრაქტიკისა და საუკეთესო მაგალითების გასაცნობად. ასევე აღნიშნა, რომ შემაჯამაბელი სემინარი ხელს შეუწყობს პროექტის ძირითადი მიზნების შესრულებას და მონაწილე ქვეყნების სტატისტიკური შესაძლებლობების გაძლიერებას. 
სამდღიან სემინარს ქართველი სტატისტიკოსების გარდა, სომხეთის, ყირგიზეთის, მოლდოვის, ტაჯიკეთის, თურქმენეთის, უკრაინის და უზბეკეთის სტატისტიკის სამსახურების ხელმძღვანელები, თანამშრომლები და საერთაშორისო ორგანიზაციების ექსპერტები დაესწრებიან.