2017 წლის 16-20 ოქტომბრის განმავლობაში ქ. თბილისში ენერგოეფექტურობის საკითხებთან დაკავშირებული საერთაშორისო დონის ტრენინგი ტარდება. ღონისძიება საერთაშორისო ენერგეტიკული სააგენტოს (IEA), საქართველოს ენერგეტიკის სამინისტროსა და ევროკავშირის ტექნიკური დახმარების პროგრამა - EU4ENERGY-ის ფარგლებში იმართება. 
საგანმანათლებლო პროგრამის ოფიციალური გახსნის ცერემონიაში მონაწილეობენ საქართველოს სტატისტიკის ეროვნული სამსახურის აღმასრულებელი დირექტორის მოადგილე გოგიტა თოდრაძე, საქართველოს ენერგეტიკის მინისტრის მოადგილე გიორგი ჩიქოვანი, უკრაინის ენერგეტიკის მინისტრის მოადგილე ნატალია ბოიკო, საერთაშორისო ორგანიზაციებისა და საერთაშორისო საფინანსო ინსტიტუტების მაღალი რანგის წარმომადგენლები. 
ხუთდღიანი ტრენინგის მიზანია აღმოსავლეთ ევროპის, კავკასიისა და ცენტრალური აზიის ქვეყნების გადაწყვეტილების მიღების პროცესში, ენერგოეფექტურობის მიმართულებით სტატისტიკის, ტრანსპორტის, შენობების, მრეწველობის, განათებისა და ელექტროტექნიკის სფეროში ჩართული პროფესიონალებისა და დაინტერესებულ მხარეთა კვალიფიკაციის ამაღლება. ტრენინგებს ატარებენ დარგის საერთაშორისო დონის ექსპერტები. საგანმანათლებლო კურსი დატვირთულია ინტერაქტიული სალექციო კურსით, პრაქტიკული სამუშაოებითა და ვიზიტებით სხვადასხვა ობიექტებზე. 
საგანმანათლებლო პროგრამაში მონაწილეობენ, საქართველოს, აზერბაიჯანის, უკრაინის, მოლოდოვას, ბელარუსიის, სომხეთის, ყაზახეთის, უზბეკეთის, ტაჯიკეთისა და ყირგზეთის წარმომადგენლები.