დღეს, 14 ნოემბერს საქართველოს პარლამენტში ჯანდაცვისა და სოციალურ საკითხთა კომიტეტის, საქართველოს სტატისტიკის ეროვნული სამსახურისა და გაეროს მოსახლეობის ფონდის (UNFPA) საქართველოს ოფისის პარტნიორობით კონფერენცია გაიმართა. ღონისძიების თემას წარმოადგენდა „სტატისტიკური მონაცემების ანალიზი პოლიტიკის დაგეგმვისთვის - საქართველოს 2014 წლის საყოველთაო აღწერის შედეგების სიღრმისეული ანალიზი.“ 
კონფერენციაზე მონაწილეებმა 2014 წლის მოსახლეობის საყოველთაო აღწერის შედეგებზე დაფუძნებული დეტალური ანალიზის შესახებ ისაუბრეს. ყურადღება გამახვილდა ისეთ მნიშვნელოვან საკითხებზე, როგორიცაა მოსახლეობის დინამიკა, მოსახლეობის დაბერება და ახალგაზრდები საქართველოში. 
საკანონმდებლო ორგანოში გამართულ შეხვედრას საქსტატის აღმასრულებელი დირექტორი, მერი დაუშვილი დაესწრო, რომელმაც კონფერენციაზე განხილული თემების მნიშვნელობაზე ისაუბრა. მისი თქმით, 2014 წლის მოსახლეობის აღწერის მონაცემთა სიღრმისეულ ანალიზს განსაკუთრებული მნიშვნელობა ენიჭება ადამიანის უფლებებზე დაფუძნებული პოლიტიკის განვითარების თვალსაზრისით. 
2016-2017 წლების განმავლობაში, შვედეთის მთავრობის მიერ დაფინანსებული UNFPA-სა და საქსტატის ერთობლივი პროექტის ფარგლებში გაეროს მოსახლეობის ფონდმა საქსტატს ტექნიკური დახმარება გაუწია 2014 წლის საყოველთაო აღწერის მონაცემთა სიღრმისეული ანალიზის მომზადებაში, მოსახლეობის დინამიკის, დაბერების, ახალგაზრდების და გენდერის საკითხებზე. 
კონფერენციაში მონაწილეობა მიიღეს საქართველოს პარლამენტის, სამთავრობო სტრუქტურების, სტატისტიკის ეროვნული სამსახურის, სამეცნიერო წრეების, კვლევითი ორგანიზაციების, სამოქალაქო საზოგადოებისა და საერთაშორისო ორგანიზაციების წარმომადგენლებმა.