დღეს, 16 ნოემბერს საქართველოს მთავრობის ადმინისტრაციისა და გაეროს სურსათისა და სოფლის მეურნეობის ორგანიზაციის (FAO) ორგანიზებით, სამუშაო შეხვედრა გაიმართა თემაზე: ,,გაეროს მდგრადი განვითარების მიზნების (SDG)-ს განხორციელების ხელშეწყობა და ჩართული მხარეების აქტიური მონაწილეობის უზრუნველყოფა, სურსათისა და სოფლის მეურნეობის როლი SDG მიზნების მიღწევაში“.
შეხვედრაზე მხარეებმა ისეთ მნიშვნელოვან საკითხებზე ისაუბრეს, როგორიცაა: FAO -ს როლი SDG განხორციელება/მონიტორინგში, საქართველოს მთავრობისა და გაეროს ორგანიზაციების საქმიანობა SDG ამოცანების და მიზნების ნაციონალიზაციის მიმართულებით, პროცესში ჩართული არასამთავრობო და კერძო სექტორის მნიშვნელობა. 
ღონისძიებას საქსტატის აღმასრულებელი დირექტორის მოადგილე მაია გუნცაძე დაესწრო. მან შეხვედრის მონაწილეებს გააცნო საქსტატის როლი SDG-ის ინდიკატორების წარმოებასა და მონიტორინგში, მონაცემთა ხელმისაწვდომობა და მეთოდოლოგია, სტატუსი და საჭიროებები. მან აღნიშნა რომ SDG-ს განხორციელება არის მნიშვნელოვანი გამოწვევა ქვეყნისთვის, ვინაიდან იგი მოიცავს სახელმწიფო მართვის ფართო სპექტრს ეკონომიკის, სოციალური და გარემოსდაცვითი მიმართულებებით. 2030 წლის მდგრადი განვითარების დღის წესრიგის მონაცემები და ინდიკატორები ქვეყნებს, განმახორციელებელ უწყებებს და სტატისტიკურ სისტემას მნიშვნელოვან გამოწვევებს უყენებს, რომელთა განხორციელება შესაძლებელია ეროვნულ დონეზე კოორდინაციის გაუმჯობესების/სრულყოფის, სისტემის მოდერნიზაციის, შესაძლებლობების გაძლიერების გზით. ვინაიდან გამოწვევები რთული და კომპლექსურია, ამიტომ სტატისტიკურ უწყებებს, პარტნიორ და საერთაშორისო ორგანიზაციებს მოუწევთ ერთობლივი მუშაობა, როგორც მეთოდოლოგიების, ასევე პრაქტიკული განხორციელების თვალსაზრისით. ამავდროულად, SDG-ი სტატისტიკური სისტემის განვითარების დაჩქარების შესაძლებლობაა. 
სასტუმრო ,,თბილისი მერიოტში“ გამართული შეხვედრის ორგანიზატორი- გაეროს სურსათისა და სოფლის მეურნეობის ორგანიზაცია (FAO) საქართველოში ახორციელებს პროექტს, რომლის მიზანია სოფლის მეურნეობის მიმართულებების გაძლიერება SDG განხორციელებასა და მონიტორინგში.