საქართველოს სტატისტიკის ეროვნულ სამსახურში სასწავლო ვიზიტით ტაჯიკეთის სოფლის მეურნეობის სამინისტროსა და სტატისტიკის სააგენტოს თანამშრომლები იმყოფებიან. 
სასწავლო ვიზიტის ფარგლებში ტაჯიკი კოლეგები შეხვედრებს გამართავენ სტატისტიკის ეროვნული სამსახურისა და გარემოსა და სოფლის მეურნეობის სამინისტროს წარმომადგენლებთან. ვიზიტის მთავარი მიზანია სოფლის მეურნეობაში რეფორმების, სხვადასხვა მიზნობრივი პროგრამების განხორციელების შესახებ გამოცდილების გაზიარება და საუკეთესო აგრო-პრაქტიკების გაცნობა. 
ორი დღის განმავლობაში საქსტატში გამართულ შეხვედრებზე ქართველი კოლეგები სტუმრებს გაუზიარებენ სოფლის მეურნეობის სტატისტიკის წარმოების, შერჩევის, მონაცემების შეგროვების, მონაცემთა დამუშავებისა და ანალიზის პრაქტიკას.
სასწავლო ტური FAO-ს პროექტის ნაწილია, რომელიც, სახელმწიფო ინსტიტუციების გაძლიერებით, ტაჯიკეთში, სოფლად ცხოვრების დონის ამაღლებას და სასურსათო უსაფრთხოების გაუმჯობესებას ითვალისწინებს.