საქართველოს სტატისტიკის ეროვნული სამსახურისა და შვედეთის სტატისტიკის თანამშრომლობის შვიდწლიანი პროექტის დასკვნითი ნაწილის პრეზენტაცია დღეს სასტუმრო ,,რედისონში“ გაიმართა. ღონისძიებაზე მხარეებმა მრავალწლიანი თანამშრომლობის ძირითადი ასპექტები შეაჯამეს და მოწვეულ სტუმრებს განხორციელებული პროექტების მოკლე ანალიზი წარუდგინეს.
საქართველოს სტატისტიკის ეროვნული სამსახურის აღმასრულებელი დირექტორის, გოგიტა თოდრაძის განცხადებით, თანამშრომლობა მიზნად ისახავდა საქსტატის, როგორც უწყების გაძლიერებას და მისი შესაძლებლობების ზრდას, როგორც მენეჯმენტის, ისე სტატისტიკური მეთოდოლოგიის გაუმჯობესების გზით. შვედმა კოლეგებმა ძალიან დიდი დახმარება გაუწიეს საქსტატს, რომელიც სხვადასხვა ტიპის სემინარებსა და სწავლებებში გამოიხატა. 
პროექტის ფარგლებში შვედი სტატისტიკოსები ქართველ კოლეგებს დახმარებას უწევდნენ - ფასების სტატისტიკის, ბიზნეს სტატისტიკის, ეროვნული ანგარიშების, ინფორმაციული ტექნოლოგიების, მენეჯმენტის, სოციალური სტატისტიკის და გარემოს სტატისტიკის მეთოდოლოგიის დახვეწის მიმართულებით. მიღწეულ შედეგებს შორის აღსანიშნავია ბიზნეს სტატისტიკის, ხარისხის, გენდერული სტატისტიკის და სოციალური სტატისტიკის მიღწევები. განხორციელდა სტატისტიკური მონაცემების ევროსტანდარტებთან მიახლოება, შემუშავდა კონფიდენციალურობის პოლიტიკა, დაინერგა და დაიხვეწა ხარისხის მართვის სისტემა, პროექტის ფარგლებში დაიწყო მუშაობა სტატისტიკის შესახებ კანონის ახალ რედაქციაზე, სრულიად ახალი სახით გამოქვეყნდა გენდერული სტატისტიკის პუბლიკაცია. პროექტის მსვლელობისას დაიწყო მუშაობა უცხოელ ვიზიტორთა სტატისტიკის შემუშავებაზე, რომლის გამოქვეყნება 2018 წლის აპრილიდან დაიწყო.
ჯამში, თითქმის შვიდწლიანი თანამშრომლობის განმავლობაში, საქსტატმა მიიღო ასზე მეტი მოკლევადიანი მისია შვედეთის სტატისტიკის დარგობრივი ექსპერტების მონაწილეობით. პროექტის ფარგლებში დაიბეჭდა რამდენიმე პუბლიკაცია, ჩატარდა სემინარები და ტრენინგები. შვედი კოლეგების დახმარებით საქსტატის თანამშრომლებმა მონაწილეობა მიიღეს გაცნობითი ხასიათის ვიზიტებსა და საზაფხულო სკოლებში. 
საქართველოს სტატისტიკის ეროვნულ სამსახურსა და შვედეთის სტატისტიკის თანამშრომლობის პროექტი 2011 წელს დაიწყო და ორი ნაწილისგან შედგებოდა. პირველი ფაზა 2014 წელს დასრულდა, ხოლო მეორე- 2018 წლის 1 ივლისამდე გასტანს.