25-27 ივნისს თბილისში მიმდინარეობს საერთაშორისო სემინარი თემაზე „გენდერული თვალსაზრისით აქტივების ფლობის სტატისტიკური გამოკვლევა შინამეურნეობებში“, რომელიც ორგანიზებულია გაერო-ს სტატისტიკის განყოფილების მიერ საქართველოს სტატისტიკის ეროვნული სამსახურის მხარდაჭერით. 
სემინარზე განიხილება გაეროს სტატისტიკის განყოფილების და პარტნიორი ორგანიზაციების მიერ მომზადებული მეთოდოლოგიური მითითებები გენდერული თვალსაზრისით აქტივების ფლობის სტატისტიკის წარმოებისათვის. მონაწილე ქვეყნების მიერ წარმოდგენილ მოხსენებებთან ერთად, გაზიარებული იქნება იმ შვიდ ქვეყანაში - და მათ შორის საქართველოში - მიღებული გამოცდილება, სადაც უკვე ჩატარდა აქტივების ფლობის პილოტური სტატისტიკური კვლევები. 
სემინარში მონაწილეობას იღებენ 12 ქვეყნის სტატისტიკის ეროვნული სამსახურების თანამშრომლები და საერთაშორისო ექსპერტები გაერო-ს სტატისტიკის განყოფილებიდან, სურსათის და სოფლის მეურნეობის ორგანიზაციიდან და აზიის განვითარების ბანკიდან.