25 ივლისი საქართველოს სტატისტიკის დღეა. ქართული სტატისტიკის დღესთან დაკავშირებით საქართველოს სტატისტიკის ეროვნულმა სამსახურმა პროფესიული დღე აღნიშნა. უწყების 99-ე იუბილეზე საქსტატმა წარმატებული და ღვაწლმოსილი თანამაშრომლები, ინფორმაციის მომწოდებელი საუკეთესო ბიზნეს კომპანიები, ასევე საერათაშორისო და ადგილობრივი პარტნიორი ორგანიზაციები სპეციალური სიგელებით დააჯილდოვა. 
სტატისტიკის ეროვნული სამსახურის აღმასრულებელი დირექტორის, გოგიტა თოდრაძის თქმით, საქსტატის უმნიშვნელოვანეს ამოცანას წარმოადგენს მომხმარებლებთან და რესპონდენტებთან მუდმივი დიალოგი. დღეს მადლობის სიგელებს გადავცემთ ჩვენს პარტნიორ ორგანიაციებს ნაყოფიერი თანამშრომლობისათვის, ბიზნეს სუბიექტებს - ხარისხიანი ინფორმაციის მოწოდებისთვის, ასევე დონორებს - საქსტატის ინსტიტუციური გაძლიერების ხელშეწყობისათვის. 
ქვეყნის პირველი სტატისტიკის სამსახური 1919 წლის 25 ივლისს შეიქმნა. შესაბამისად, აღნიშნული თარიღი საქართველოში ოფიციალური სტატისტიკის წარმოების დაწყებას უკავშირდება. საქართველოს სტატისტიკის ეროვნული სამსახური ყველა სტატისტიკოსს ულოცავს აღნიშნულ დღეს და უსურვებს პროფესიულ წარმატებებს. 
სტატისტიკის დღესთან დაკავშირებით სპეციალური სიგელები გადაეცა საერათაშორისო და ადგილობრივ პარტნიორ ორგანიზაციებს: გაეროს ბავშვთა ფონდს (UNICEF), გაეროს მოსახლეობის ფონდს (UNFPA), შვედეთის საერთაშორისო განვითარების სააგენტოს (SIDA), გაეროს ქალთა ორგანიზაციას (UN WOMEN), აშშ-ს სოფლის მეურნეობის დეპარტამენტს (USDA), საქართველოს ენერგეტიკისა და წყალმომარაგების მარეგულირებელ ეროვნულ კომისიას, ასევე დაავადებათა კონტროლისა და საზოგადოებრივი ჯანმრთელობის ეროვნული ცენტრს. ხოლო ინფორმაციის მომწოდებელ საუკეთესო კომპანიებად დასახელდნენ - შპს „ჯი თი გრუპი“, სს „მინა“, შპს „სტარ არ ჯი“, შპს „აიდიეს ბორჯომი ბევერიჯიზ კომპანიის საქართველოს ფილიალი“, შპს „მარშე“, შპს ავიაკომპანია „ჯორჯიან ეარვეის“, შპს „კაპაროლ ჯორჯია“, შპს „ჯორჯიან უოთერ ენდ ფაუერი“ შპს „საქართველოს გაერთიანებული წყალმომარაგების კომპანია“, შპს „მარცვლეულის ლოგისტიკის კომპანია“, სს „ხრამჰესი I“, შპს „RMG Gold“, შპს „ჯი-ემ-პი“, შპს „ჰაიდელბერგბეტონ ჯორჯია“, სს სამკერვალო კომპანია „იმერი“, შპს „თ და კ რესტორნები“, შპს „ოტრიულა“ და შპს „გურია - ექსპრესი“.