საქსტატმა ფინეთის სტატისტიკის სამსახურთან თანამშრომლობა დაიწყო

თარიღი: 15 ივლისი 2024

საქართველოს სტატისტიკის ეროვნული სამსახური, ევროკავშირის მიერ დაფინანსებული თვინინგის პროექტის „საქართველოს სტატისტიკის სისტემის შემდგომი გაძლიერება“ ფარგლებში, ფინეთის სტატისტიკის სამსახურის გენერალური დირექტორის მოადგილე მარი ილა იარკს და ტვინინგის პროექტის ლიდერ კატრი კაიას მასპინძლობს. 

 

ორდღიანი მისიის მიზანს წარმოადგენს საქსტატში არსებული მდგომარეობის გაცნობა,  პროექტის ერთ-ერთი კომპონენტის (სტანდარტებისა და კლასიფიკატორების მეთოდოლოგიური შესაბამისობის  უზრუნველყოფა) განხორციელებისთვის  მოსამზადებელი  სამუშაოების ჩატარება და სამომავლო გეგმების დასახვა.

 

მისიის ფარგლებში ფინეთის სტატისტიკის სამსახურის წარმომადგენლები საქსტატის აღმასრულებელ დირექტორს გოგიტა თოდრაძეს შეხვდნენ, რომელმაც ფინელ კოლეგებს მისასალმებელი სიტყვით მიმართა და საქართველოს სტატისტიკის ეროვნული სისტემის სტრუქტურა, არსებული მდგომარეობა და სამომავლო გეგმები გააცნო. 

 

შეხვედრაზე გოგიტა თოდრაძემ ასევე ისაუბრა საქსტატის მიერ განხორციელებული აქტივობებისა და მიმდინარე პროექტების შესახებ. 

 

მისიის ფარგლებში ფინელ ექსპერტებს დაგეგმილი აქვთ შეხვედრები თვინინგის პროექტში ჩართულ სტრუქტურული ერთეულების ხელმძღვანელებთან და  თანამშრომლებთან.

 

თვინინგის პროექტის განხორციელება საქსტატში 2024  წლის აპრილში დაიწყო და 2 წლის განმავლობაში გაგრძელდება.  პროექტი მიზნად ისახავს ქვეყანაში სტატისტიკის სისტემის შემდგომ გაძლიერებას, საქსტატის მიერ დროული, საერთაშორისო დონეზე შესადარისი, სანდო მონაცემების წარმოებასა და მის დაახლოებას ევროპულ სტანდარტებთან. თანამშრომლობა სამ ძირითად კომ-პონენტს აერთიანებს: სტანდარტებისა და კლასიფიკატორების მეთოდოლოგიური შესაბამისობის უზრუნველყოფა, დემოგრაფიული და მოსახლეობის სტატისტიკის გაუმჯობესება და  სამთავრობო უწყებების შესაძლებლობების გაძლიერება ოფიციალური სტატისტიკის წარმოებისა და გამოყენებისთვის.   

 

საქსტატში თვინინგის პროექტს მსოფლიოში ერთ-ერთი ყველაზე განვითარებული სტატისტიკის სისტემის მქონე ფინეთის სტატისტიკის სამსახური ახორციელებს, გემრანიისა და იტალიის სტატისტიკის სამსახურებთან ერთად.