საქართველოს სტატისტიკის ეროვნული სამსახურის (საქსტატის) აღმასრულებელმა დირექტორმა გოგიტა თოდრაძემ, 2024 წლის მოსახლეობისა და სასოფლო სამეურნეო აღწერის ფარგლებში, დუშეთის მუნიციპალიტეტში საინფორმაციო შეხვედრა გამართა.

თარიღი: 7 აგვისტო 2024

შეხვედრას ესწრებოდა მუნიციპალიტეტის მერი მანანა ნარიმანიძე, ასევე ადგილობრივი მმართველობისა და თვითმმართველობის წარმომადგენლები სხვადასხვა ადმინისტრაციული ერთეულებიდან.

შეხვედრა მიზნად ისახავდა მუნიციპალიტეტის წარმომადგენელთა ინფორმირებას აღწერის საორგანიზაციო საკითხებთან დაკავშირებით.

შეხვედრისას გოგიტა თოდრაძემ დეტალურად ისაუბრა აღწერის მიზნებისა და ამოცანების, აღწერის ჩატარების თარიღის, მონაცემთა შეგროვების მეთოდების, მეთოდოლოგიისა და კითხვარის შინაარსის შესახებ.

საქართველოში მოსახლეობის აღწერა 2024 წლის 14 ნოემბრიდან 19 დეკემბრის პერიოდში ჩატარდება. თუმცა, ამინდის შესაძლო გაუარესების გამო, ზოგიერთ მაღალმთიან და ძნელად მისადგომ ადმინისტრაციულ ერთეულში, მათ შორის, დუშეთის რამდენიმე ადმინისტრაციულ ერთეულში (გუდამაყრის, ქვეშეთის, ხევსურეთის, უკანაფშავის, შატილის და მაღაროსკარის და ფასანაურის ადმინისტრაციულ ერთეულში შემავალ სოფლებში), ასევე მესტიის, ლენტეხის, ახმეტის (ომალოს ადმინისტრაციულ ერთეულში), მოსახლეობის აღწერის ჩატარება 2024 წლის სექტემბერშია დაგეგმილი.

ამასთან, რესურსების ოპტიმალურად გამოყენების მიზნით, მოსახლეობის აღწერასთან ერთან დაგეგმილია სასოფლო-სამეურნეო აღწერის ჩატარება, რომლის ფარგლებშიც შეგროვდება ინფორმაცია შინამეურნეობების სასოფლო-სამეურნეო აქტივობის შესახებ.

აღწერის წინასწარი შედეგები გამოქვეყნდება 2025 წლის ივნისში, ხოლო საბოლოო შედეგები ხელმისაწვდომი იქნება 2026 წლის ივნისში.

აღწერის შედეგად მოპოვებულ იქნება უახლესი ინფორმაცია მოსახლეობის რიცხოვნობის, მისი სქესობრივ-ასაკობრივი სტრუქტურის, დასაქმების სტატუსის და განათლების დონის, ჯანმრთელობის მდგომარეობის, საარსებო წყაროებისა და საბინაო პირობების შესახებ.