შეხვედრა სახელმწიფო რწმუნებულებთან და მერებთან

თარიღი: 12 ნოემბერი 2024

საქსტატის აღმასრულებელმა დირექტორმა გოგიტა თოდრაძემ შეხვედრა გამართა სახელმწოფო რწმუნებულებთან და ადგილობრივი მმართველობისა და  თვითმმართველი ქალაქების მერებთან. შეხვედრაზე, რომელსაც 100-ზე მეტი მონაწილე ესწრებოდა განიხილეს  2024 წლის მოსახლეობის და სასოფლო-სამეურნეო აღწერის საკითხი. შეხვედრა ონლაინ რეჟიმში ჩატარდა. 

 

გოგიტა თოდრაძემ  მონაწილეებს დეტალური ინფორმაცია მიაწოდა 2024 წლის აღწერის შესახებ. მისი თქმით,  2024 მოსახლეობის და სასოფლო-სამეურნეო აღწერა  მიმდინარე წლის 14 ნოემბერს დაიწყება და  19 დეკემბრის ჩათვლით  გაგრძელდება. აღწერა ჩატარდება ორ ეტაპად. 

 

პირველ ეტაპზე, 14 ნოემბრიდან 23 ნოემბრის ჩათვლით პერიოდში მონაცემები შეგროვდება თვითრეგისტრაციის მეთოდით (CAWI). თვითრეგისტრაცია წარმოადგენს მონაცემთა შეგროვების მეთოდს, როდესაც რესპონდენტები დამოუკიდებლად, ინტერვიუერების გარეშე, კომპიუტერის/პლანშეტის/სმარტფონის მეშვეობით, სტანდარტული ინტერნეტ ბრაუზერის გამოყენებით, ელექტრონულად ავსებენ კითხვარებს. აღნიშნული მეთოდის გამოყენება ხელსაყრელია იმ რესპონდენტებისთვის, რომელთაც არ სურთ ინტერვიუერის სახლში სტუმრობა ან/და არ აქვთ საკმარისი დრო პირისპირ ინტერვიუსთვის.

 

თვითრეგისტრაციის მსურველებისთვის საქსტატშმა შექმნა სპეციალიური ვებ-პლატფორმა, რომელიც განთავსებულია  საქსტატის ვებ-გვერდზე https://census2024.geostat.ge/ka.

 

ხოლო მეორე ეტაპზე, 29 ნოემბრიდან - 19 დეკემბრის ჩათვლით პერიოდში, მონაცემები შეგროვდება საქსტატის ინტერვიუერების მიერ, კარდაკარის პრინციპით, პლანშეტური კომპიუტერის გამოყენებით.

 

აღწერის შედეგების საფუძველზე ხელმისაწვდომი იქნება ზუსტი და განახლებული მონაცემები, როგორც მოსახლეობის რაოდენობის, მისი სქესობრივ-ასაკობრივი შემადგენლობის, სხვადასხვა დემოგრაფიული, სოციალურ-ეკონომიკური მახასიათებლების მიხედვით, ასევე შინამეურნეობების სასოფლო-სამეურნეო აქტივობის შესახებ, თვითმმართველი ერთეულებისა და დასახლებების დონეზე.