ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
უკან დაბრუნება
თარიღი: 6 მარტი 2025
საქსტატის აღმასრულებელი დირექტორი გოგიტა თოდრაძე გაეროს სტატისტიკის კომისიის 56-ე სესიას ესწრება, რომელიც ქ. ნიუ-იორკში, აშშ-ში იმართება. წლიურ შეხვედრაში გაეროს წევრი ქვეყნების სტატისტიკის სამსახურის ხელმძღვანელი პირები და საერთაშორისო ორგანიზაციების წარმომადგენლები მონაწილეობენ.
გაეროს სტატისტიკის კომისია წარმოადგენს უმაღლესი დონის სამთავრობათაშორისო ფორმატს და სტატისტიკური საქმიანობების შესახებ საერთაშორისო დონეზე გადაწყვეტილებების მიმღებ უმაღლეს ორგანოს, რომელიც ზედამხედველობას უწევს გაეროს სტატისტიკის სამმართველოს (UNSD).
ვიზიტის ფარგლებში, გოგიტა თოდრაძე კომისიის წევრებს მოხსენებით მიმართავს და მონაწილეობას მიიღებს სხვადასხვა პანელურ დისკუსიაში. ის დამსწრე საზოგადოებას წარუდგენს ინფორმაციას საქართველოს სტატისტიკის სისტემაში ბოლო პერიოდში განხორციელებული ცვლილებებისა და მიღწეული პროგრესის შესახებ. განსაკუთრებული ყურადღება დაეთმობა 2024 წლის მოსახლეობისა და სასოფლო-სამეურნეო აღწერას. ამასთან, ის ისაუბრებს სხვადასხვა მიმართულებით არსებულ გამოწვევებზე, დასახავს სამომავლო გეგმებსა და პრიორიტეტებს.
სესიის პარალელურად საქსტატის აღმასრულებელ დირექტორს დაგეგმილი აქვს ოფიციალური შეხვედრები სხვადასხვა საერთაშორისო ორგანიზაციისა და პარტნიორი ქვეყნების სტატისტიკის სამსახურების ხელმძღვანელებთან. შეხვედრებზე განიხილება როგორც მიმდინარე, ასევე სამომავლო თანამშრომლობის საკითხები. ეს წარმოადგენს მნიშვნელოვან შესაძლებლობას საქართველოსთვის საერთაშორისო დონეზე შესადარისი სტატისტიკური მეთოდოლოგიების შემუშავების, დანერგვისა და ოფიციალური სტატისტიკის ხარისხის გაუმჯობესების კუთხით.
