საქსტატსა და საქპატენტს შორის მემორანდუმი გაფორმდა

თარიღი: 27 მარტი 2025

საქართველოს სტატისტიკის ეროვნულ სამსახურსა და საქართველოს ინტელექტუალური საკუთრების ეროვნულ ცენტრს შორის მემორანდუმი გაფორმდა. ურთიერთთანამშრომლობის შესახებ შეთანხმებას ხელი მოაწერეს სტატისტიკის ეროვნული სამსახურის აღმასრულებელმა დირექტორმა გოგიტა თოდრაძემ და საქართველოს ინტელექტუალური საკუთრების ეროვნული ცენტრის თავმჯდომარემ სოსო გიორგაძემ.

 

მემორანდუმის მიზანია მხარეებს შორის თანამშრომლობის გაღრმავება. ასევე, საერთო ინტერესებიდან გამომდინარე, ერთობლივად დაგეგმილი ღონისძიებების ფარგლებში ცოდნისა და გამოცდილების გაზიარება, რომლებიც ხელს შეუწყობს ქვეყანაში ინტელექტუალური საკუთრების დაცვას, ინტელექტუალური საკუთრების სფეროში ცნობიერების ამაღლებასა და საქსტატის პროდუქტების/სერვისების შესახებ ცნობადობის ამაღლებას.

 

სტატისტიკის ეროვნული სამსახურის აღმასრულებელი დირექტორის, გოგიტა თოდრაძის განცხადებით მემორანდუმის ფარგლებში უზრუნველყოფილი იქნება მხარეებს შორის მჭიდრო თანამშრომლობა:

 

„დღეს გაფორმდა მემორანდუმი სტატისტიკის ეროვნულ სამსახურსა და საქართველოს ინტელექტუალური საკუთრების ეროვნულ ცენტრს შორის, რომლის მიზანიცაა ერთობლივი მუშაობით, ცოდნისა და გამოცდილების გაზიარების გზით, ეფექტიანად განვავითაროთ და გავაძლიეროთ ინტელექტუალური საკუთრების სფერო. შევთანხმდით რომ დავგეგმოთ და განვახორციელოთ აქტივობები, რომლებიც ხელს შეუწყობს ორივე სფეროს შესახებ ინფორმირებულობის გაზრდასა და ფართო საზოგადოებაში შესაბამისი ცოდნის გავრცელებას. გარდა ამისა, ამასთანავე, მხარეები აქტიურად მივიღებთ მონაწილეობას კონფერენციებსა და სემინარებში, რომელთა მიზანია სფეროში არსებული ახალი ტენდენციებისა და ცოდნის გაზიარება“,- აღნიშნა გოგიტა თოდრაძემ.

 

როგორც საქპატენტის თავმჯდომარემ სოსო გიორგაძემ აღნიშნა, ერთობლივი ღონისძიებების დაგეგმვა და განხორციელება, მნიშვნელოვანია საქსტატის პროდუქტების/სერვისებისა და ინტელექტუალური საკუთრების სფეროში საზოგადოებრივი ცნობიერების ამაღლებისთვის. 

 

„მემორანდუმის ფარგლებში ერთობლივი ღონისძიებების დაგეგმვა და განხორციელება მიზნად ისახავს საქსტატის პროდუქტებისა და სერვისების, ასევე ინტელექტუალური საკუთრების სფეროში საზოგადოების ცნობიერების ამაღლებას. შევთანხმდით აქტივობების დაგეგმვასთან დაკავშირებით, რათა განხორციელდეს შეხვედრები, კონსულტაციები და სხვა ფორმატის ღონისძიებები დარგობრივ ექსპერტებს შორის, რომლებიც უზრუნველყოფს ეფექტური ინფორმაციის გაცვლას და ორმხრივი ინტერესის სფეროში პროგრესს“, - განაცხადა სოსო გიორგაძემ.

 

მემორანდუმის თანახმად, მხარეთა მიერ ნაკისრი ვალდებულების შესრულების პროცესის ეფექტიანობის უზრუნველყოფის მიზნით, საჭიროების შესაბამისად გათვალისწინებულია სამუშაო შეხვედრების ორგანიზება, საკონტაქტო პირების გამოყოფა და ორივე მხარის მიერ და ცალკეული შეთანხმებების გაფორმება.