განმარტება დასაქმების სტატისტიკასთან დაკავშირებით

თარიღი: 3 ივნისი 2016

ბოლო დროს საქსტატის მიერ წარმოებული დასაქმება/უმუშევრობის სტატისტიკის მეთოდოლოგიასთან დაკავშირებით სხვადასხვა მოსაზრება გამოითქვა. აღნიშნულთან დაკავშირებით საქსტატს სურს განმარტოს, რომ საქსტატი მოსახლეობის ეკონომიკური აქტივობის/სტატუსის (დასაქმებული, უმუშევარი, ეკონომიკურად არააქტიური) სტატისტიკას აწარმოებს შინამეუნეობების ინტეგრირებული გამოკვლევის საფუძველზე და ხელმძღვანელობს შრომის საერთაშორისო ორგანიზაციის (ILO) მეთოდოლოგიით, კერძოდ, შრომის სტატისტიკის მე-13 კონფერენციაზე მიღებული რეზოლუციის მიხედვით. 

აღნიშნული მეთოდოლოგიით ხელმძღვანელობს მსოფლიოს პრაქტიკულად ყველა ქვეყანა, რაც ხელს უწყობს ოფიციალური სტატისტიკის სისტემების შეთანხმებულობას და ეფექტიანობას, ქვეყნებს შორის ინფორმაციის ურთიერთშესადარისობას. 
2017 წლიდან საქსტატი გეგმავს სამუშაო ძალის მოდულის გამოყოფას შინამეურნეობების ინტეგრირებული გამოკვლევიდან და დამოუკიდებელი, რეგულარული სრულმასშტაბიანი სამუშაო ძალის გამოკვლევის დანერგვას. 2017 წლიდან სამუშაო ძალის კვლევის შერჩევის ჩარჩო განახლდება მოსახლეობის 2014 წლის საყოველთაო აღწერის ბაზის საფუძველზე; იგეგმება შერჩევის ზომის გაზრდა, რომელიც მოსახლეობის ეკონომიკური აქტივობის კვარტალური მაჩვენებლების წარმოების და გავრცელების საშუალებას მოგვცემს; ასევე, იგეგმება სამუშაო ძალის კითხვარის გაფართოება და იმ ინდიკატორების წარმოება და გავრცელება, რომელიც აუცილებელია ქვეყნის შრომის ბაზრის მიმოხილვისა და დახასიათებისათვის, ქვეყანაში მიმდინარე სოციალური და ეკონომიკური სიტუაციის ზუსტი შეფასებისათვის. 
ამასთან უნდა ავღნიშნოთ, რომ საქსტატი 2017 წლიდან დასაქმებისა და უმუშევრობის ინდიკატორების დათვლისას კვლავ იხელმძღვანელებს შრომის საერთაშორისო ორგანიზაციის მიერ რეკომენდირებული მეთოდოლოგიით, რომლის მიხედვით ამჟამად დასაქმების და უმუშევრობის მაჩვენებლების დათვლა ხორციელდება. აქედან გამომდინარე, დინამიკაში დასაქმების და უმუშევრობის სტატისტიკაში მნიშველოვან ცვლილებებას არ უნდა მოველოდეთ.