საქართველოს სტატისტიკის ეროვნული სამსახურისა და შვედეთის სტატისტიკის თანამშრომლობის პროექტის ფარგლებში, საქსტატი შვედი ექსპერტების მოკლევადიან მისიას მასპინძლობს. უწყებაში მიმდინარე ოთხდღიანი შეხვედრის მთავარი თემაა სტატისტიკური მონაცემების ხარისხის მონიტორინგი. 

შვედი სტატისტიკოსები ქართველ კოლეგებს გაუზიარებენ თავიანთ გამოცდილებას, გაეცნობიან აღნიშნული მიმართულებით საქსტატში არსებულ მდგომარეობას და შეიმუშავებენ შესაბამის რეკომენდაციებს, რომლებიც გამოყენებული იქნება საქსტატში შესასრულებელი სამუშაოების საფუძვლად. 

აღსანიშნავია, რომ სტატისტიკური მონაცემების ხარისხის უზრუნველყოფის საკითხი ასახულია საქართველოსა და ევროკავშირს და ევროპის ატომური ენერგიის გაერთიანების და მათ წევრ სახელმწიფოებს შორის ასოცირების შეთანხმებისა და საქართველოსა და ევროკავშირს შორის დღის წესრიგის განხორციელების ეროვნულ სამოქმედო გეგმაში. გეგმა ითვალისწინებს 2018 წლის განმავლობაში ყველა სტატისტიკური პროცესისა და პროდუქტისთვის ევროპის სტატისტიკური სისტემის მოთხოვნების შესაბამისად მეტამონაცემების/ხარისხის მოხსენებების მომზადებას და გამოქვეყნებას. 

შვედეთის სტატისტიკურ უწყებას ამ სფეროში მნიშვნელოვანი გამოცდილება გააჩნია და მისი გაზიარება მეტად სასარგებლო იქნება ხარისხის უზრუნველყოფის სფეროში საქსტატის საქმიანობის სრულყოფისთვის.